Publisert: 01.12.2011 kl. 23:11
Endret: 01.12.2011 kl. 23:14
Av: Gunnar Wiik
Jarle Waldemar reiser land og strand rundt. Førjulstida er hektisk for den unge mannen som mellom anna er kjend for varierte publikasjonar som ”Jarle-TV”, bøker, ulike CD- og DVD-utgivingar, i tillegg til barnegospel, konsertar og andre typar arrangement med kristent innhald. Etter å ha gjort konsertar i Bergen er Jarle no på sunnmørsvisitt, der han syng jula inn saman med ulike lokale barnekor.
Torsdag kveld heldt Jarle Waldemar konsert i Hareid kyrkje saman med songglade barn, og no går det slag i slag. Fredag blir det konsert i Herøy frikyrkje; laurdag står Vigra bedehus for tur, og søndag vitjar barnepredikanten Filadelfia i Ålesund – der ei familiegudsteneste står på plakaten – før sunnmørsvisitten blir avrunda med konsert på Emblem.
- Svigermor er frå Gurskøy. Sunnmøringar er veldig trivelege, så det er alltid stas å vere på desse kantar av landet, insisterer Waldemar.
